a cò mieu

EFS

Mon, 11 May 2009 19:24:50 +0100

Adieussiatz mond. Vaquí una sonada a vòtra generositat. Coma o sabètz, cada annada amb lo retorn dels jorns bèls, los accidents de la rota creisson e los besonhs de sang de l'EFS tanben. Alavètz, se cal bolegar e anar ajudar los que n'an besonh. Una pichòta "presa de sang" pòt sauvar una vida. En donar un pauc de vòstre temps e de vòstre sang, podètz melhorar l'avenidor d'un que n'a plan besonh. Es pas mai dolorós qu'una presa de sang e tota persona de mai de 18 ans e en bona santat pòt donar. Podètz anar veire sul siti de l'
EFS

Comments

A Banhèras

Mon, 11 May 2009 19:13:56 +0100

Aquesta tantossada, amb mon companh, anèrem a Aquensis a Banhèras, que la bèla maire nos aviá ofèrt un massatge a cadun per Nadal. Lo mieu èra "Ritual colors d'endacòm mai". Res que lo nom fasiá pantaissar. En fach aquel nom escond un gomatge e un massatge amb d'òlis essencialas. Pel massatge, anava. Mai, lo gomatge... Cresiái que m'anava arrapar la pèl. Segur que soi pas acostumada de far tot aquò donc dèu èsser normal; mai èra temps que s'arrestèsse. Per acabar nos prepausèron de que beure (cafè, chocolat, infusion...). Era un bon moment, agradiu, solament esperavi un pauc mai d'evasion e de viatge olfactiu amb aquel nom.

Comments

Lo "Pacte des loups"

Sun, 10 May 2009 12:19:38 +0100

Coma o sabètz benlèu, una partida del film "le Pacte des loups" foguèt enregistrada dins las Baroniás. Puèi, an traçat un camin d'excursion que passa pels luòcs del tornatge. A partir del vilatge d'Esparros, cal montar fins al "Pla de Moula". Arribatz dins una prada enrodada de montanhas, es de tota beutat. Per far la passejada (comptatz 3 a 4 oras), cal seguir los caps de lop jaune. Aquela sason, amb l'estiu, es una de las melhoras, lo païsatge es verd, los tropèls son defòra... Cal pas èsser espacialament entraïnat mai val mai aver de bonas cauçuras, que per endrech lo camin es malaisit. Si que non una es una polida passejada. Los païsatges son magnifics, passatz al mitan dels bòsques, al pè de la montanha.. Vos explican tanben ont apareisson los luòcs dins lo film (mai bon, per aquò cal aver vist lo film, çò qu'èra pas mon cas).
Donc s'avètz l'escasença de passar dins lo canton, es una passejada que vos conselhi de far. Seretz pas decebuts.

Comments

Extra-terrestre

Sun, 10 May 2009 09:08:51 +0100

Avètz ausida la novèla cançon d'Arielle Dombasle amb Philippe Katerine? Se sòna Extra-terrestre. Es excellenta. A la debuta l'aimavi pas. Me demandavi qual èra aquela coneria. Mai a fòrça de l'escotar, m'agrada. Cal reconéisser qu'i a una vertadièra recèrca artistica. Pòdon paréisser estranhs totes dos mai faguèron un vertadièr trabalh de creacion. Lo mescladís de las guitaras, de sa votz a ela que remembra l'operà... Jos l'aspècte leugièr de la cançon, òm pòt devinhar tot lo trabalh necessari.

Comments

Una impression de printemps

Fri, 08 May 2009 13:03:28 +0100

Amb lo retorn del printemps e lo revelh de la natura, tròbi qu'es l'escasença de legir o tornar legir aquel polit tèxt de Max Roqueta sul parpalhon. Es tirat de son Bestiari e vos daissi apreciar sa poësia encantaira.

Lo parpalhon

Despuòi que lo Cèl, maucorat, a defugit la tèrra, se vei pas pus passar d'angèls que van per òrta.
Davant, ne'n n'aviá de pertot. E mai s'aimavan pas gaire de se faire entrevistar.
N'i aviá de tota mena. Aquels que nos gardavan, anuòch coma lo jorn. E que, mai d'un còp per nòstra fauta, ploravan de rescondons.
N'i aviá per gardar òrts e fontetas. Còsta dau sant empeirat o de lenha qu'a fòrça d'espiar au cèl, ne delembravan son prètzfach.
Eran bèls. E joves, eternament. E vestits de sas grandas alas blancas. Qu'i venián a la cavilha. E fasián vergonha a la nèu.
Un bèl còp darrièr, jos lo clar de luna, an pres sa volada. Degun los veirà pas pus. Lo mond n'es demorat moquet.
Mas, suspreses per lo comand davalat de la nivol, nos an pasmens daissat un signe amic. Meravilhós per quau lo vòl entendre.
Coma èran, quand davalèt lo comand, nos an daissat sas mans, sas doas mans, juntas dins la pregària.
Pausadas sus la flor dubèrta ont s'apilavan per pregar, de juntas mans, drech levadas, e plan apegadas, totas doas.
E los rebats totes de sos sòmis, sòmis d'angèls de milanta colors, nos es demorat coma lo signe de tot lo bèl de la tèrra e dau cèl.
E n'avèm fach lo parpalhon. Quand dormís sus la pimpanèla.

Sabètz ara d'ont ven lo parpalhon.

Comments

Qu'es aquò lo 8 de mai?

Fri, 08 May 2009 12:37:56 +0100

Ièr un amic me demandèt çò que representava lo 8 de mai. Manquèri de tombar de cuòl. Segur cal pas demorar virat cap al passat e cal agachar l'avenidor, mai i a pr'aquò de causas de saber. Parlarai pas del dever de memòria qu l'escòla parla plan de tot aquò (e òc, cal escotar en cors).
Donc, lo 8 de mai, per respondre a la question de l'amic, correspond a la fin de la guèrra de 1939-1945. Me sembla qu'aquò fa partida de l'istòria pròcha, qu'aguèt d'incidéncias sus la vida de nòstres parents o de nòstres grands e qu'es donc normal d'o conèisser. Un pauc d'interès per l'istòria nòstra, seriá pas que per respècte pels que perdèron lor vida. Disi pas que cal seguir las ceremonias e tot aquò, mai al mens saber. L'istòria fa çò que sèm. Donc, vaquí pel pichòt cors d'istòria. Rendètz-vos pel cors venent lo 18 de junh, s'aquò vos parla...

Comments

Bonjorn a totes

Fri, 08 May 2009 12:26:47 +0100

L'idèa de crear aquel blòg es pas mieuna, aquò's segur. M'agrada pas particularament de botar mos vejaires en linha. Mai bon, es per l'universitat, fa partida del cors de practica de la lenga, donc ai pas la causida. Paralarai un pauc de tot, ai pas encara d'idèa precisa mai deuriá venir.

A lèu donc per un messatge novèl.

Comments